انصار: (د لړم ۲۴ مه)، د افغانستان د خبریالانو مرکز وویل چې طالبانو په ننګرهار کې پر عکس اخیستلو او ویډیو جوړولو بندیز لګولې ده.
دغه مرکز د «د سختو محدودیتونو» او «د رسنیو د وضعیت د خرابېدو» په اړه خبرداری ورکړ.
ننګرهار پنځم ولایت دی چې طالبانو په رسمي ډول د ژوندي سارو، د عکس او ویډیو خپرول منع کړي دي.
د امر بالمعروف او نهی عن المنکر قانون د اوولسمې مادې له مخې، د ژوندیو موجوداتو د تصویر خپرول منع شوي دي او طالبانو هڅې زیاتې کړې دي چې دا قانون په تدریج په ټول هیواد کې پلي کړي. دغه منع په تدریجي ډول پله ولایتونو څخه پیل شوې خو په کابل کې لا هم تصویري رسنۍ فعالیت لري.
د افغانستان د خبریالانو مرکز په یوه اعلامیه کې وویل چې «په دې وروستیو کې د طالبانو سیمه ییزو چارواکو په ننګرهار کې دولتي ادارو ته پامر کړی چې د عکس اخیستلو، د تصویر خپرولو او تصویري مرکې بندې کړي.
دغه مرکز خبرداری ورکړ چې «په بیلابیلو ولایتونو کې دغه محدودیتونه، چې په تدریجي ډول پراخېږي، د رسنیو د ازادۍ د وضعیت د لا خرابېدو او د ځپنې د زیاتېدو ښکاره نښې دي.»
دغه مرکز همدارنګه وویل چې د طالبانو دغه پرېکړه په ځینو ولایتونو کې د محلي او دولتي تلویزیونونو د بندېدو لامل شوې ده.
د دې مرکز په وینا، د ولایت د اطلاعاتو او کلتور ریاست د سې شنبې په ورځ محلي رسنیو ته خبر ورکړی چې له سیمه ییزو چارواکو سره عکس اخیستل او تصویري مرکې کول منع دي. دغه مرکز وویل چې دوی د دې حکم یوه کاپي لیدلې ده.
د ننګرهار د طالبانو مرستیال والي عزیزالله مصطفی ویلي چې د ژوندیو موجوداتو د تصویر د منع کولو لپاره، د عقرب په ۲۲ مه په دې ولایت کې یوه «نظامي غونډه» جوړه شوې ده.
د ننګرهار مرستیال والي ټینګار کړی چې له دې وروسته مسوولان باید د ژوندیو موجوداتو له عکس اخیستلو او خپرولو ډډه وکړي او په خپلو راپورونو کې د انځورونو پر ځای د لوګو، لوحه یا د ادارې د ودانۍ عکسونه وکاروي.
هغه همدارنګه سیمه ییزو مچارواکو ته سپارښتنه کړې چې که له رسنیو سره خبرې کوي، یوازې په غږیز ډول دې مرکې وکړي.
ننګرهار پنځم ولایت دی چې په رسمي ډول په کې د ژژوندي سارو د عکس او تصویري مرکې منع شوي دي. تر دې مخکې په کندهار، تخار، بادغیس او هلمند کې دا منع په بشپړ ډول پلې شوې ده.
د افغانستان د خبریالانو مرکز ټینګار کړی چې دا نوې محدودیتونه د رسنیو او خبریالانو ستونزې، چې په تېرو درې کلونو کې د محدودیتونو له څپو سره مخامخ شوي، زیاتوي.
دغه مرکز د طالبانو له مشرتابه څخه وغوښتل چې په دې پرېکړه له سره غور وکړي او د بیان ازادي او د خبریالانو او رسنیو بنسټیزو حقونو ته درناوی وکړي.
خو دا په داسي حال کې ده چې د طالبانو مشر باور لري چې د تصویر خپرول یا د انځور ایستل د خدای پاک د خدايي ننګول دي!
URL تعقيب: https://www.ansarpress.com/pashto/34366
